Dalawang sikat na Pinoy cue artist ang naimbitahan na maglaro para sa 2008 PartyPoker.net World Pool Master na nakatakda sa darating na Mayo sa magarang Riviera Hotel and Casino sa Las Vegas, Nevada. Sina Francisco “Django” Bustamante at Alex Pagulayan ang nabigyan ng magandang pagkakataon para makasali sa World Pool ngayong taon dahil na rin sa kanilang mataas na kalibre pagdating sa bilyar.

Ang organizer ng event na Matchroom Sports ay nagpadala ng imbitasyon sa dating world no. 1 na si Bustamante at dating world champion na si Pagulayan. Napili sila ng Match Room Sports na maglaro sa tournament na kinikilalang isa sa prestihiyosong kompetisyon sa larangan ng bilyar.

Ang dalawang Pinoy billiard players ay makakasama ni 18-year-old Taiwanese sensation Ko Pin Yi na isa sa mga Asian na nakasali sa 3-araw na tournament.

Ang naturang torneo ay magbibigay ng total pot na $62,000 o P2.48 M, kasama na ang lion’s share na $20,000 o P800,000 para sa pagiging kampeon. Sasabak sila kontra sa 13 magagaling na world-class pool masters, sa pangunguna ni defending champion Thomas Engert ng Germany at reigning world pool champion Daryl Peach ng England. Ang iba pang naimbitahan na sumali ay sina dating world titlists Mika Immonen ng Finland at Ralf Souquet ng Germany, kasama na rin sina Christian Reimering, Tony Drago ng Malta, Niels Feijen ng Netherlands, Bruno Muratore ng Italy, Mark Gray at Imran Majid ng England, Shane Van Boening, Rodney Morris at Corey Deuel ng United States.

“Within four World 9-Ball Champions, six US open Champions and a host of other title-holders in the field, I believe that this will be the toughest ever World Pool Master”, sabi naman ni Matchroom Sport chairman Barry Hearn.

“With winner breaks, race to eight matches on the toughest equipment, it will take series of fantastic performances over the thrue days to lift this prestigious trophy,” dagdag pa nito.